SANTA FE, N.M. — အကယ်ဒမီဆုရ သရုပ်ဆောင် Gene Hackman၊ ဇနီးဖြစ်သူနဲ့ သူတို့ရဲ့ခွေးကို နယူးမက္ကဆီကိုပြည်နယ်ရှိ နေအိမ်မှာ ဗုဒ္ဓဟူးနေ့က သေဆုံးလျက် တွေ့ရှိခဲ့ကြောင်း အာဏာပိုင်များက ပြောကြားပါတယ်။
လူသတ်မှုလို့ မသင်္ကာပေမယ့် သူတို့ရဲ့သေဆုံးမှုအခြေအနေတွေကို အာဏာပိုင်တွေက ထုတ်ပြန်ခြင်းမရှိသေးဘဲ စုံစမ်းစစ်ဆေးမှုတွေ ဆက်လက်လုပ်ဆောင်နေတယ်လို့ ဆိုပါတယ်။
Santa Fe County Sheriff ရဲ့ လက်ထောက်တွေဟာ Hackman, ဇနီးဖြစ်သူ Betsy Arakawa နဲ့ ခွေးတစ်ကောင်ကို နေ့လည် ၁ နာရီ ၄၅ မိနစ်ဝန်းကျင်မှာ နေအိမ်ကို သွားရောက်စစ်ဆေးချိန်မှာ သေဆုံးလျက် တွေ့ရှိခဲ့တာလို့ ပြောရေးဆိုခွင့်ရှိသူ Denise Avila က ပြောပါတယ်။
Hackman (၉၅) နှစ်ဟာ အကယ်ဒမီဆုအတွက် (၅) ကြိမ်အမည်စာရင်းတင်သွင်းခံရဖူးပြီး ရုပ်ရှင်ကားပေါင်းများစွာမှာ ပါဝင်သရုပ်ဆောင်ခဲ့တဲ့ ဂုဏ်သိက္ခာရှိပြီး လေးစားခံရတဲ့ သရုပ်ဆောင်တစ်ဦး ဖြစ်ပါတယ်။ သူဟာ The French Connection နဲ့ Unforgiven ရုပ်ရှင်တွေနဲ့ အကယ်ဒမီဆုနှစ်ကြိမ် ရရှိခဲ့ပြီး နှစ်ဆုကြားမှာ (၂၁) နှစ် ကွာခြားပါတယ်။
သူသေဆုံးတဲ့သတင်းဟာ ဒီနှစ်ရဲ့ Academy Awards အခမ်းအနားမတိုင်ခင် (၄) ရက်အလိုမှာ ထွက်ပေါ်လာတာ ဖြစ်ပါတယ်။
သူတို့ဇနီးမောင်နှံရဲ့နေအိမ်ဟာ နယူးမက္ကဆီကိုပြည်နယ်ရဲ့ မြို့တော် Santa Fe အပြင်ဘက်က ခြံစည်းရိုးခတ်ထားတဲ့ လူနေအိမ်ရာမှာ တည်ရှိပါတယ်။ Hackman ဟာ ၁၉၈၀ ခုနှစ်များအတွင်း အဲဒီဒေသကို ပြောင်းရွှေ့ခဲ့ပြီး မြို့ထဲမှာ မကြာခဏ တွေ့ရလေ့ရှိကာ ၁၉၉၀ ခုနှစ်များအတွင်း Georgia O’Keeffe Museum ရဲ့ ဘုတ်အဖွဲ့ဝင်အဖြစ် ဆောင်ရွက်ခဲ့တယ်လို့ ဒေသခံသတင်းစာ The New Mexican မှာ ဖော်ပြထားပါတယ်။
Hackman ဟာ အမျိုးမျိုးသောဇာတ်ရုပ်တွေကို သရုပ်ဆောင်ခဲ့ပြီး အက်ရှင်ကားတွေ၊ သည်းထိတ်ရင်ဖိုကားတွေမှာ ပါဝင်သရုပ်ဆောင်ခဲ့သလို Young Frankenstein မှာ ဟာသဇာတ်ရုပ်နဲ့ ပါဝင်ခဲ့ပါသေးတယ်။
ဆုပေးပွဲအခမ်းအနားတွေမှာသာ တွေ့ရလေ့ရှိပြီး Hollywood ရဲ့ လူမှုရေးအသိုင်းအဝိုင်းမှာ ရှားရှားပါးပါးသာ တွေ့ရလေ့ရှိကာ အသက် (၇၀) နှစ်ကျော်အရွယ်မှာ အနားယူခဲ့ပါတယ်။
သူ့ရဲ့ ပြန်ကြားရေးအရာရှိထံ ပေးပို့ထားတဲ့ အီးမေးလ်ကို ကြာသပတေးနေ့အစောပိုင်းမှာ ချက်ချင်းတုံ့ပြန်ခြင်း မရှိသေးပါဘူး။